الانتحار مشكلة كبيرة، وللأسف مع الهشاشة النفسية اللي بيمر بيها ناس كتير، بنلاقي بين وقت للتاني ناس بنحبهم ممكن ينتحروا لسبب أو لآخر! فازاي نمنع الأفكار دي وازاي نساعد حد بيفكر في الانتحار؟ ده اللي هنحاول نغطيه في مقالنا ده! فاتأكد من قرائته بالكامل!
بتفكر في الانتحار؟
حاسين بيك في حجم الألم اللي بتعانيه دلوقتي، وانتا مش وحدك، في ناس كتير بتجيلهم أفكار الموت والرغبة في الانتحار في مرحلة ما من حياتهم، وشعورك ده مش عيب في شخصيتك أو معناه إنك ضعيف أو مجنون أو فيك عيب، أو عار أو كافر أو غيرها، ولكن إنتا معنى الأفكار دي إن عندك ألم كبير، أكبر من إن العالم يستوعبه، ومع مرور الوقت ومع الدعم تقدر تتغلب على ألمك ده مهما كان حجمه وتدي العالم بعبوص كبير بعد نجاتك.
ليه عندي الرغبة في الانتحار أو أسباب الانتحار
في أنواع كتيرة من الألم العاطفي ممكن تتسبب في أفكار الانتحار، والأسباب أكيد بتختلف من شخص للتاني وبتختلف حسب قدرتنا على التعامل مع الألم، لكن دي بعض حاجات لازم تخليها في بالك لما تفكر في الانتحار:
هل الانتحار هو الحل الوحيد؟
العجز ساعات عن التفكير في حلول أو شعورك إنك تايه في وسط ألمك ومش لاقي حد تسند عليه ممكن يكون السبب الأساسي في الانتحار، والالم العاطفي اللي بنعيشه ساعات بيعمينا عن التفكير في المستقبل وبيخلي من الصعب علينا نشوف حلول ممكنة للمشاكل المختلفة وإن الانتحار هو الحل، بس ده مش صح! وهقولك ليه بعدين.
التفكير في الانتحار مؤقت دايمًا
عن نفسي كنت زيك في يوم، الرغبة في الموت، والرغبة في إنهاء الحياة كان بيطاردني، لكن الحزن والألم كان مؤقت، صحيح وقتها كنت بحس إن حياتي هتبقى كلها بالشكل المؤلم ده، لكن عديت وعشت حياة حلوة بعد الأفكار الصعبة دي، ومشاعري اتغيرت، علشان كده بقولك اصبر على ألمك وبلاش تستعجل في التفكير في الانتحار، لأن الانتحار حل دائم لمشكلة مؤقتة يا صاحبي ويا صاحبتي!
كل المشاكل ليها حلول، غير الانتحار أكيد
لو كان عندك أزمة نفسية، اكتئاب، فصام، اضطراب ثنائي القطب أو غيرها، ومن خلال تغيير نمط حياتك ومع الأدوية والعلاج السلوكي المعرفي، هتقدر تتعافى وحالتك هتتحسن، دايمًا دايمًا مهما كانت المشاكل كبيرة والحلول كلها بتودي لحيطة سد، لازم تعرف إن في حلول تانية بديلة عن الانتحار.
عند التفكير في الانتحار اعمل ده فورًا
لو الرغبة في الانتحار زادت عليك في وقت ما بننصحك تعمل الخمس حاجات دول فورًا ومن غير تفكير:
أول خطوة : أجل الانتحار دلوقتي
صحيح! لو جاتلك أفكار انتحارية نوعًا ما، أو الألم زاد عليك، فادي لنفسك فرصة إنك تحس بآلامك وخلي في مسافة بين الشعور بالألم واتباعه في إيذاء نفسك، استنى وأجل قد ما تقدر بدون ما تعمل حاجة، وليكن أسبوع مثلًا.
التفكير في الانتحار حاجة والإقدام عليه حاجة تانية، فالأفكار مش لا زم تتحقق، هو في حاجة في الدنيا دي بتتحقق! وكده كده معندكش ديدلاين أو موعد بيلّح عليك ويقولك في الوقت الفلاني الساعة الفلانية لازم تعمل كذا، بالعكس، حط مسافة بين أفكار وبين أفعاك!
تاني خطوة: بلاش مخدرات أو كحول لو في أفكار انتحارية
لأن الأفكار الانتحارية ممكن تزيد لو تعاطت مخدرات أو أي نوع من أنواع الكحول، وكمان مهم لو بتستخدم أودية مخدرة لما تكون مكتئب أو عندك ميول للانتحار، لأنه لو تناولت الحاجات دي بتحس بتضخيم في مشاعرك واللي ممكن يدفعك لفعل حاجة مينفعش ترجع بعدها تاني للحياة!
تالت خطوة، خلي البيت أمان
اتخلص من أي حاجة ممكن تتسبب في إنك تؤذي نفسك أو تحقق أفكار الانتحار، سواء كانت حبوب أو سكاكين أو شفرات حلاقة أو أسلحة نارية أو غيرها، ولو مقدرتش، فحاول تتنقل لمكان آمن مفيهوش الحاجات دي حواليك، ولو كنت بتفكر تتعاطى جرعة زايدة من الدوا، فورًا ادي الدوا لحد من صحابك أو حبايبك يديك على قد جرعتك!
رابع خطوة: بلاش تخلي مشاعر الانتحار لنفسك
صحيح مجتمعنا اللطيف ممكن يحكم علينا بالجنون لو شاركناه رغباتنا الانتحارية، لكم افتكر إن أهم حاجة في التعامل مع الأفكار والمشاعر الانتحارية هي إنك تشاركها مع شخص بتثق فيه وبتثق في إنه مش هيحكم عليك، ممكن يكون الشخص دا أحد أفراد الأسرة أو صديقًا أو معالجًا أو شيخ أو قسيس أو مدرسًا أو طبيب أو مدرب أو أي حد.
حتى لو الأفكار راحت شوية جرب تكلم خطوط الدعم الساخن حواليك، لمنع الانتحار في بلدك، في مصر مثلًا ممكن تكلم لأمانة العامة للصحة النفسية، على رقم 08008880700، 0220816831، طوال اليوم كل يوم.
بلاش تخلي الإحراج أو الكسوف أو الخوف من الوصمة يمنعك من انك تطلب المساعدة، خليك بجح لأن العالم قاسي واحنا وحدنا صعب نكون قدّه!
خامس خطوة: لسا في أمل، خد بالك
حتى الناس اللي زيك في لحظات ألم صعبة، قدروا يتخطوها ويتجاوزوها كل اللي عليك إنك تدي للأمل فرصة علشان تتغلب على المشاعر دي، بغض النظر عن مقدار كرهك لنفسك أو يأسك أو العزلة اللي انت فيها حاليًا، بغض النظر عن سوداوية الحياة، الدنيا شرموطة يا صاحبي، يوم فوق ويوم تحت زي ما الشاعر ما قال! فادي لنفسك وقت ومتحاولش تعمل كل حاجة بنفسك أو تشيل وحدك كل الهموم، زيح وعيش.
لو عندي أفكار انتحار، ازاي أتكلم عنها؟
اتكلم مع شخص انت واثق منه، ومتأكد إنه هيكون متعاطف ومتقبل لكلامك، لأنك مش محتاج تتكلم مع حد هيحكم عليك أو هيقولك “استرجل” أو غيرها، انت محتاج حد يكون جنبك بدون شروط وبدون أفأفة (من كلمة أوف)، ولما تقرر تدي الثقة دي لأي حد تجربة مشاركة الأفكار الانتحارية بتكون صعبة خالص وبتصعب الموضوع عليك أكتر!
لو شاركت أفكار الانتحار ومحدش سمعك تعمل إيه؟
لو في شخص تواصلت معاه ومقدرش يسمعك أو يفهمك، فحاول تقول لشخص تاني أو تتكلم مباشرة بمراكز المساعدة اللي وفرناهالك فوق لأن تجربة سيئة في الكلام عن الانتحار مينفعش توقفك عن الكلام عنه لطلب المساعدة.
كيف تتعامل مع الرغبة في الانتحار؟
لو كان عندك مشاعر وأفكار ورغبات انتحارية مش بتوقف اعمل ده:
- اتكلم مع شخص بتحبه وواثق فيه كل يوم، يفضل الكلام يكون وجهًا لوجه حتى لو حسيت إنك مش عايز تشارك شجع نفسك وانزل أو قابلهم واتكلموا عن مشاعرك.
- حط خطة أمان من مجموعة من الخطوات، زي الأرقام اللي ممكن تتواصل معاها لو الرغبة في النتحار ضغطت عليك، وخلي صحابك وأسرتك يساعدوك في وقت الطوارئ!
- اكتب لنفسك جدول، والتزم بيه مهما كانت الظروف، وحافظ على الروتين قدر الإمكان حتى لو كانت مشاعرك خارج السيطرة!
- اخرج للشمس في الشتا أو في ليالي الصيف النسيمة لمدة 30 دقيقة على الأقل يوميًا.
- مارس الرياضة على قد ما تقدر، ابدأ بحاجات بسيطة لأنه تم إثبات إن 3 دفعات من النشاط مدتها 10 دقائق ممكن يكون ليها تأثير إيجابي على الحالة المزاجية .
- خصص وقت للحاجات اللي بتحبها وبتبسطك، حتى لو كانت قليلة في الوقت الحالي، العب مع حيوانات الشارع والحيوانات الأليفة أو ارجع لأنشطة تانية سابقة كنت بتعملها!
ومهم في أوقات التفكير عن الانتحار تبعد عن:
- إنك تكون وحد لأن الشعور بالوحدة ممكن يفاقم أفكارك الانتحارية ويزودها، زور حبايبك اتحرك واتنطط وروح هنا وهنا.
- بلاش كحول ومخدرات لأنها ممكن تزود اكتئابك وتخلي التعامل مع مشكلاتك وأفكارك صعب ولأنها كمان ممكن تخليك تتصرف باندفاع.
- بلاش تتعرض لمحتوى يخلي أفكار الانتحار تهيج عليك، سواء بسماع مزيكا حزينة أو زيارة صور مواقف صعبة أو قراءة رسايل مستفزة أو زيارة القبور وقت التفكير في الموت أو غيرها من الحاجات اللي ممكن تسيب مشاعر سلبية في نفسك.
علاج التفكير في الانتحار
حتى لو أفكارك هديت وراحت أفكار الانتحار لحالها، اطلب المساعدة لبعدين لأن تجربة الألم العاطفي مؤذية، وممكن مجموعات الدعم أو الدكتور النفسي المناسب يساعدك أكتر في علاج هذه الأفكار من جذورها! لكن مهم تسأل عنه وتشوف تقييمات الناس ليه، وتقدر كمان:
- تحدد المحفزات أو المواقف اللي بتسيب شعور باليأس جواك أو بتولد أفكارًا انتحارية، مثل ذكرى خسارة شخص عزيز، أو الكحول، أو التوتر ودراما العلاقات أو غيرها من الأماكن اللي ممكن تتجنبها لأن فيها ذكريات صعبة.
- اهتم بنفسك أكتر، كُل وجبات صحية، ونام كويس، ومارس تمارينك بانتظام لأنها بتفرز الإندورفين، وبتخفف التوتر، وبتعزز الرفاهية العاطفية والنفسية.
- ابني شبكة دعم لطيفة حواليك، خلي ناس إيجابيين قدامك في حياتك، يخلوك راضي عن نفسك، مش كل اللي بتشوفه دموع في دموع في دموع!
- مارس أنشطة واهتمامات جديدة، وابحث عن هوايات جديدة أو عمل تطوعي يخليك تحس بمعنى الحياة وقيمتك فيها وإن حياتك فارقة لأنك لما بتعمل حاجات مُرضية مُرضية، هحس بتحسن في صورتك تجاه نفسك.
- تعلم كيفية التعامل مع التوتر بطريقة صحية. ابحث عن طرق صحية للسيطرة على مستويات التوتر لديك، بما في ذلك ممارسة الرياضة والتأمل واستخدام تقنيات الاسترخاء مثل تمارين التنفس البسيطة وتحدي.
في كل بلاد العالم، دوّر على أقرب وسيلة دعم ليك من هنا Befrienders Worldwide أو IASP أو الخطوط الساخنة الدولية للانتحار.
اقرأ أيضًا: الميول المثلية | أكبر دليل على الإنترنت لتفهم نفسك؟
اقرأ أيضًا: هل أنا مثلي الجنس؟ كل ما تحتاجه لتعرف ميولك
[…] اقرأ أيضًا: 5 أشياء تحتاجها عند التفكير في الانتحار | دليل كامل، مهم… […]